夢想

曾經好天真好傻，入行係因為，大學時期，身邊所有朋友，都係熱血大學生咁滯。見面傾社會議題，活動係搞書會聽talk去遊行，會遊遊下喊出黎，又會一有政圈大事就約埋一齊吹水。

因緣際會之下識到佢地，由當年一個連有幾個政黨都唔知既中學生，忽然認識社會，人生，第一個範式轉移。又因呢班朋友細既都大我兩三年，自已見識淺差一大截，搏命追，諗都唔駛諗就入呢行。

一路做都係不斷覺得唔夠，直到舊年年底左右，兩件事，一件係做記者朋友攞料但我發現佢問既野表面過表面，另一件係在學時一位神級師兄同我講，做電台節目時用左我幾個吹水時的觀點。

好開心終於有些少認同/成果時，但跟住，發現，成班朋友，幾乎都己另有專職：金融、教書、記者、公關、講師之類，見面少左吹社會事，有吹，一係資料唔多，一係就高高舉起社會公義呀道德呀之類。

或者真係年紀問題掛，各人也是自有他的煩惱，浮遊熱血青年都開始為口奔馳；奔馳之餘有空間，消費下食玩飲去下旅行，咁囉。堅持到當初目標既人都有，少d囉，所以，有多少冷清既感覺。

冷清之餘，好衝擊我既係，成班人，叻既好多家底厚既有學養勁既又有超聰明既又有精通幾種語言既有政圈事比我宜家更熟既，都有，但都半退唔跟呢行事。我，算係乜野?

又，呻一兩句，當兩老謝曬咁嘆氣話一世人最唔忿氣無買到屋要住公屋，心都實埋。係，佢既目標唔等於我既目標，但既然自己無目標，將佢地既目標當目標，既可推缷責任個籍口又好聽喎。

係呀，所以諗轉工諗左好耐，因為，我一轉，就係轉行無回頭，放棄緊呢5年相信同堅持既野。所以，真係好唔捨得。因為，曾經，呢份工，呢個狀態，幾乎係夢想。

~~~~~~~~~~~~~~~~~~~~~~~~~~~~
文章作出修改, 是因為, 又惹起誤會傷到人. 無論如何, 抱歉.
又, 近日心情精力去到谷底, 但由於自己定左目標要"學做人", 在人前就盡力精神吸收正能量, 學也得累, 打篇文想呻下, 落筆之時卻又忘了要時刻在線, 就出事.
寫文, 都係學習的一部份, 提自己.