紮鐵工潮(三)

矛頭轉向地產發展商，比起硬捽紮鐵商會自然好玩多；向睇樓客派傳單，呼籲市民停買樓杯葛無良發展商，自然更加好玩就是。最好將個議題升格到經濟結構過於偏側股樓為核心的模式如今不合時宜但仍陰魂不散理當總動員黎個大批判，正。

而又，對於又有新左青入場玩，我又反而覺得影響不大。事關工運的形象唔知點解一直都偏低，盡管期期民調幾家工會都排頭，但肯落場玩既議政青年，大都寧願入鴿、袋、圓桌以至獨媒。搞手老化的問題其實家家都差唔多，仁記行AO制好少少，但今次炒左又反映此制在統合上的漏洞，工運青年始終難入場。

是以工運有多點後生面孔，好事嘛，而且工運涉及的技術性以至團隊聯絡等，都比其他基層問題更形複雜(個人偏見)，反正並非單方面熱血上頭高喊自由平等之類口號可以推動/摷禍。雖然，睇到新左青有些文章出現「三行喺建築行頭係最核心最重要既工作xxxx」之類，偷笑之餘都替作者擔心，比外三行(水喉電燈泥水)的師傅聽到，小心人地小九你喎。

不過真係好頂唔順有d文職行頭亂寫既文(聲明: 絶對係一小部份)。白領又或專業行頭支持工運當然好，但唔好一副悲天閔人”憐憫”小狗咁既樣同心態同觀念好唔好，請花些少時間理解下工人+工會+商會+發展商的關係，以及整個建造業行頭在過去二十年與香港經濟的關係，就知咁既局面大家都幾乎有份。

下下跳過呢d實務野然後將個問題升格為咩人權呀尊嚴呀良知呀，事實上，要在道德位上崗上線的話，買樓供樓炒樓，原則上都可以話間接幫緊發展商剝削工人架。更唔好提好多在城規問題上抱持幾乎原教旨方針，一件都唔好拆唔好起的社運人，佢地拖慢左既許多工程，間接打爛緊建造業工人飯碗喎。

如果小資消費是指嘲諷現實而不與現實接觸，呢單野裏頭，都算幾突顯到社運裏頭的小資消費問題。當然，成件事最叻係曾生，明框係佢點起個火，但出左咁大隻鑊乜都燒唔到佢身上，為官之道越黎越熟練，利害利害。