唔知點解覺得好好笑既新聞

足球射爆巴士車窗一人傷
(明報) 06月 29日 星期五 10:15PM

九巴一輛巴士晚上駛經九龍城亞皆老街一個足球場時，突然飛來一個足球，打爆上層車窗，一人受傷。

被打爆的是上層左邊的兩個車窗，碎片擊傷一名男乘客，他要送院治，車長停車並報警，但警員到場時已找不到踢波的人。

~~~~~~~~~~~~~~~~~~~~~~~~
同彬少一齊笑到碌地, 揣測在該場地需以何等球速角度方能射爆玻璃兼傷人. 嗰球, 應該係高波炒底.

休息

想小休幾日..

然而對於一個工作量幾近零的人, 點先叫休息呢?

旅行

同事某一見張相，就話「好靚喎邊度黎架? 你近排去左旅行咩?」
辜勿論我同佢日夕相對之下，我點樣去左旅行而佢唔知，重點係佢竟然認唔出相中地點，兼對於靚景=旅行有絶對的信心。

K小姐話，因為去旅行心情唔同，街邊一隻狗都吸引人撲埋去影。
唔，咁有心情的話，香港可唔可以都係一個好地方?
定係，旅行=一定好心情，於是一有假期就雞飛狗走人人外遊?
再加，要心情好=唯有去旅行，於是唔去旅行就等於無放過假?
定好似k小姐咁，香港係用黎搏殺，去旅行就係為左休息唔用腦?
為左唔用腦去到咁遠，但又為左賺盡張機票日日跑景點??
景點呢樣野，旅發局豎個牌話係就係，咁我點樣知道佢真定假?
Ok風景無得冒，但點解有d風景係景點有d唔係?
如果去完旅行影埋一叠唔係景點既風景，我點樣解比人聽我去左咩地方?
但點解去完旅行一定要比相人睇，然後講解一次旅行流程???
???????????????????????????????????????
發緊癲胡亂思考中…

頂癮

難得有事跟某君通電話，但其人事事小心步步為營的說話，讓我窒息。

好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮好頂癮…

索性撒手不理一走了之算數。考慮中…

舊文一則

民主又好, 普選又好, 當現實係基層連識字都成問題, 有時都覺得, 陳義過高是否有意義.
當然, 有人話有左前兩樣才會有平等機會, 所以先要爭取然後放長雙眼等待. 但若然係等一個希望, 咁同社會主義叫大家相信, 終有一天會到達大同世界, 又有咩分別呢...
係呀, 係好偏激呀, 跟cases跟到好無癮發緊牢騷, 唔好同我講道理住呀...
~~~~~~~~~~~~~~~~~~~~~~~~~~~~~

中國文盲人數升33% 逾一億
都市日報 2007-05-02

儘管中國政府花了五十多年開展掃盲運動，2000年更宣布基本消滅文盲，但中國的文盲仍在不斷增加。2000年至2005年，中國的成年文盲人數從8,700萬增至1.016億，上升33%；即使在文盲增加之前，中國文盲就已佔全世界文盲的11.3%。

據內地傳媒報道，一項普查顯示，去年，貴州省有一個村莊所有村民都能讀寫1,500個漢字，村幹部並舉辦聚餐以示慶祝。

不過，當詢問學校的校長究竟有多少人，能真正讀書寫字，校長尷尬地笑一笑，稱因為普查根據的是考試，根本不能計算出有多少文盲。

造成文盲原因複雜

報道又指出，造成文盲的原因十分複雜，包括農村教育的經費問題，以及中國城市對農民工的需求，使很多人離開學堂到遙遠的城市謀生等。

據報道，中國近年來，更是不斷努力提高教育水準，比如立法規定每名兒童都必須接受九年義務教育，但很多農村地區根本沒有學校或者學費高昂。

此外，在中國，非文盲的定義為通過考試確立，不過，即使人們通過考試，通常也不再繼續唸書，既然平時無需讀書寫字，很多人也就忘了這些基本技能，這種情況在少數民族、農村婦女，以及失學少年當中尤為突出。

短打(六)

老港正傳

公司派平飛，同事們約埋一齊睇，問埋老闆去唔去。
老闆話：駛乜睇佢啫，睇我咪得囉，真人騷。

加人工

公務員加人工，幾廿憶係咁派出去，恐佈。教師社工醫生都出黎嘈，但比D姐一句收左皮。
問資深同事點解社工可以封套教師醫生唔可以，無人答到我。

林鄭

真係夠膽見天星左青們?
但同事謂見左反而無事，據往績，林鄭一定耍得掂。

大曾生

議事規則會順勢傾大小委員會重組，每提及民政局都有人抽水，主席大曾生全程尷尬。
大狀議員都乘機取笑「主席駛唔駛避席我代主持會議」。

西九

成個融資走回頭路由管理局批合約出去，變相同宜家康文批約一樣。
會前揾勻報紙連部落，竟然只得三五篇有討論。
從前唔明既然街外咁多議政人，養我地呢班政策研究人做乜，現在，明。

選擇

到底應該好好工作定讀多d書?
to be or not to be??
頂好老土...小咁老土既野竟然都煩左我個幾月..

通k的意義

個人定義「可以通k的年紀」，只會是當通k過後飲埋早茶，還可以繼續過正常的一天(諸如繼續返工返學打波睇戲)，然後在正常時間上床再休息。然而近幾次的通k過後竟然要立即訓，且訓超過24小時後才重新做人(周5晚通完到現在周日下午4:00才開始工作，死未)。認，我係過左可以通k既年紀。

然而k還是繼續通，除了放不下大群朋友喧鬧的瘋癲，還有當然是許許多多一齊大既廣東歌。實在除非是從6歲開始買帶聽，否則真真只有在k房才能將想聽的歌從頭到尾找遍。

於是從最集體回億的關正傑甄妮蔡國權等一大堆劇集主題曲開始，到中間beyone草猛radius達明等樂隊年代，到真係一齊大既四大天王李克勤王菲關淑怡，然後是消費年代有錢買碟既楊千樺陳奕迅何韻詩林一峰at17等等，再加少量有錢都唔會買碟既周國賢謝安琪ck劉浩龍之類。能夠讓人十多小時從頭到尾想聽邊隻叫邊隻聽足一晚，得番k房囉。

大群人一齊通的意義，還要是點得《天意人心》自然一齊懷腼無記《燃燒歲月》同期那堆非常好睇既戲集情節(竟然好多人記得嗰句「97後香港見」，大家真好記性)，一見radius便有人尖叫「周小姐跟佢好過啦」，點左郭富城會得齊齊識跳佢隻機械人舞，有人話要點《約定》跟手都識點埋《郵差》，又或一水過將新四天后(楊容何鄭)的首本曲亂點，然後逐首比較批評歌路以及中間的是非。

當然一定有想要但失左踪既歌(例如明哥最好的合唱《漩渦》)，然而即便沒有了還是可以成群人一齊嗱住咪趁過場時齌唱，絶頂。是以面對近年每下愈況的廣東歌壇，K房對我們這些就黎無法通k的一輩而言，某程度上算是對廣東歌輝煌日子的最後懷腼，好灰。

所以，仲有無人想通k呀? 下星期五繼續。

碟短：《V For Vendetta》+廣告

在學時期, 曾經同一班友一齊搞左個吹水會, 近排某人真金白銀買個網址番黎, 將個吹水會在網上復活.
於是碟短一稿兩用, 為自己個blog灌水之餘, 也廣邀各位芳鄰一齊黎吹水.
~~~~~~~~~~~~~~~~~~~~~~~~~~

英國唔知咩時代，一條蒙面佬，某個霄禁半夜忽然入侵公共廣播系統大播〈1812序曲〉，引曬全城人破禁出街之後用煙花炸左國會大樓，然後上埋電視大吹哲學水並呼籲全城人明年今日齊齊造反。造反理由係：人民不應該懼怕政府，政府應該懼怕人民”(People should not be afraid of their governments, governments should be afraid of their people)。

然後整部電影幾乎與這約會無關，糾糾纏纏在蒙面佬的私人恩怨與禁室培育接班人的關係之中，除左半夜唔準出街禁詩禁音樂禁做類頭條新聞節目外，點解迫到民怨沸騰就無乜點解到。不過，戲還是看得過癮，事關直接描寫左翼革命的戲實在少，這一套的意識也比《博擊會》去得更盡情。

不斷重播的〈1812序曲〉算是影射/追認/崇拜俄國革命的影響，反正連我個左翼導師都話人民革命好似真係得嗰次成功；V個標記戲話係佢間囚室既羅馬數字編號，但其實圓圈加V字有好多人指出係無政府主義的A(Anarchy)倒轉少一筆；結尾仲要走個人出黎打劫時嗌多句「Anarchy in UK！」，得喇我明導演(拍Matrix對兄弟)你好左喇。

搗亂當然痛快，但整套電影除左恐怖主義式的破壞外，對於精英知識份子如何與民眾建立溝通/指引/互動/合作、政府如何以穩定為借口強化機器管治剝削民權、民眾在需要政府維持秩序與生活被入侵自由受損等等等，通通都沒有深入討論。當然導演可能側重想表達個人覺醒的重生，但個覺醒理由除左私怨之外實在十分無力，場景營造得太卡通亦都無左Matrix那種超前感。

當然，由Hugo Weaving(即係Matrix 入面既Agent Smith )飾演蒙面佬，即便由頭遮到落腳都有戲比你睇到；Natalie Portman剷青被禁室培育為革命接班人，雖然將套戲演到似《The Phantom of the Opera》，但與v那種亦師亦父亦情人的關係實在浪漫死(係我非常羨慕)。而個結局其實寫得幾好，對社運以至左翼發展有興趣既朋友，都值得買黎一看。

而，套戲比人笑係左翼的天方夜譚，其實又未必，至少墨西哥反抗軍扎柏斯特（Zapatista）蒙面領袖馬可斯（Marcos），匿跡叢林深處以「Don’t hate media, be media」為號召，利用互聯網組織知識份子，統合墨西哥農民齊齊反抗政府保衛土地，堅時到咁多年迫得到政府肯同佢地坐底和談，都算有成果。

所以還是相信，人民力量總會有覺醒的一天，然後齊齊上街和平地迫政府變回人民的政府。

我改

OK, 我改...
學習低調, 學習好脾氣, 學習說中庸的話, 學習唔over acting.
來吧讓我變成另一個人.

好攰

無野做但係好攰好攰...
字都無力打, 貼住可愛小東西開心下.
上圖小東西為jonah, 老死的1.2歲大兒子, 小兒子-0.7歲, 犘門教小信徒, 長居猶他州, 嗜好玩水, 尤其玩馬桶的水水(剛好夠高哩~).

所謂既派糖...

人事編制小組委員會會議議

2007年6月13日(星期三)上午8時30分

文件 : EC(2007-08)8

「我們需要加強支援新的電影發展局的工作和電影發展基金( 下稱「發展基金」)的管理。當局建議向發展基金注入3 億元， 並擴大其適用範疇。

「我們建議由2007 年7 月9 日起，在影視及娛樂事務管理處(下稱「影視處」)轄下電影發展局秘書長的新職系和職級內， 開設1 個常額職位(首長級薪級第2 點) 。

「開設電影發展局秘書長的職位後，助理處長(娛樂事務)會繼續協助影視處處長處理娛樂牌照及相關事宜， 包括《淫褻及不雅物品管制條例》( 第390 章)的執法和檢討工作， 報刊註冊和遊戲機中心發牌事宜，以及監督影視處的部門行政工作。

「助理處長(娛樂事務)除正常職責外，還須在2007 和2008 年進行兩項具體的法例檢討。鑑於報章和娛樂雜誌刊登不雅內容的情況激增， 社會各界和立法會都十分關注， 助理處長( 娛樂事務)正積極檢討《淫褻及不雅物品管制條例》以加強對屢犯者的阻嚇作用。另一方面， 因應最新的科技發展和媒體匯流， 助理處長(娛樂事務)亦會檢討《電影檢查條例》的適用範疇， 確保條例有利業界投資嶄新科技和創新服務(例如戶外媒體)。

「我們預計， 這兩項法例檢討工作可於2008 年或之前完成。我們會在短期內全面檢討影視處的整體組織架構， 以便在2008 年或之前為整個電子通訊業成立新的統一規管機構2。

~~~~~~~~~~~~~~~~~~~~~~~~~~

政府派一粒糖, 又點會唔係想換你一間廠.
雖然, 有業界人士覺得, 反正佢唔派糖都會收番你間廠, 派左先咪己經叫比面囉....
well, 香港電影瀕臨死亡從來都不是單一原因.

大禮

孫公屋企單野，唉……

率先被抓的，未算最激進，而那天衝也不是衝最前，抓他當然是官府借刀殺人。不即場抓最激的一群而事後到他家中抓，嚇埋屋企人之餘，也就坦白告訴所有人，「點左佢相」知道他是長毛的同事。

但問題是，公眾意見一面倒……無法不覺得是天星後遺症──不是指衝的那班給抓去了(抱歉我幾乎有點黑心地覺得佢地想人拉好耐)，而是給官府借刀殺人之餘，還失去了公眾的支持。

即係，當你係又衝唔係又衝再加沒有好好解釋你想點，公眾慣性接收衝突畫面之後，只係會問"衝孫公屋企同公屋減租又咩關係??"……

抱歉，今次真係自己行動出錯，而再繼續只是祭出「政治迫害」又「打壓社群」之類，想達到咩目的? 政圈內人唔同意個方向，唔出手放料，佢地繼續單打獨鬥，死梗。再加比機會班官借刀殺人，可惡!!(尚幸今日遇到長毛，佢話那位同事的身體同官司都將安好。)

有傳話唔會有大事，等下個月新班子公佈，由佢地做人情。而呢份大禮，相信曾新班子收到開心死。