我寫的東西變了反對的文章

早幾篇文章被轉貼到獨立媒體, 被罵是自然的, 但所說的都不是我想問的重點. 惟有再回應, 希望有真正的討論.

~~~~~~~~~~~~~~~~~~~~~~~~~~
一看到我寫的東西被歸進了"反對的文章"便心感不妙, 奇怪, 寫出來是希望我這個站在另一角度的人, 能為這件事留下另一角度的描述, 但迅速地成了"反對"的聲音, 倒真始料不及。

如要表明立場，就如近幾日我在各處討論時都先留言「不是說熱血青年不好，建制外有建制外做建制內有建制內做，今次頭痕純因建制外亂做搞到建制內更難做啫」。幾日的貼文其實都不過想表明/討論，建制外你們的做法，對跟進城規工作會帶來的轉變，咁囉。

樓上幫我澄清「批評的不是有人忽然走出來，而是一些不實在，甚至自我感覺良好的一群」，實在感謝。的確，那些自我感覺良好我問佢佢既目標目的行動方略係乜都答唔出既人，我仍舊不滿；李金鳳所貼的文其實說得更好，然而看各人的回應我仍看不出往後的行動即係點。

最後的回應那長篇大論，就是即便班門弄斧亦希望整理出城規工作的跟進模式(同事都建議我畫個圖讓人們易於理解)，亦在其中希望建制外的你們想想，可以在什麼時候從中怎樣做，也就不用被人說凡事太遲。

建制必然存在，除非你們下一波行動便能推翻政府，否則理解建制發生咩事是重要的；而且更重要的是，如何連結居民做好前期工作，才是行動的重要關鍵。朱凱迪說「天星、灣仔、觀塘、荃灣等等儘管是同一個大問題的衍生物，可是亦各有各的差異」。對極，其中居民意願可是天差地異的事。

你們的組織可有朋友長期監察各規劃的進度? 散落在規劃以外的各工程(即歸左入經濟發展項目之類)邊個區有乙丙級工程己在諮詢階段? 有朋友在觀塘做長期的聯繫以向居民解說計劃的問題所在嗎? 油麻地區居民到底想改善交通定想要玉器市場多點?

就如中九幹線原來只要稍改工程模式其實便能不影響舊區又解決交通問題，就如西九現在由小組傾其實更嚴重地被政府分化更難以有實效。推倒容易，重來/建立才是關鍵。

回應‧順便做個大總結

回應樹雄對如何「mon實」政府城規工作，我嘗試將我所知的城規步伐理清，但肯定有錯漏(因為真係好複雜)，請高手指正。
~~~~~~~~~~~~~~~~~~~~~~~~~~~~~~~~~~~

居民或民間組織的參與，就是政府交城規前所做的前期工作。其實諮詢文件會交區議會討論(部份區議會網頁會逐月刊登有關消息，但有好多剩係會出議員開完會的會議紀錄)；區議員做唔做就真係自決，所以你會在新聞見到某些區就規劃特多新聞，如黃大仙同灣仔，因為有林文輝同黃英琦在。當然未至於完全唔通知受影響居民，是以有時類似的問題會讓該區其他組織「食左」，灣仔喜帖街的雅各伯就是一例。

另一方面的前期工作，就是當計劃涉及撥款時，交由立法會各委員會分工審議。於是，中九幹線在交通會、搬碼頭拆尖咀廣場在經濟會；而這些小panel傾完之後，政府會將之分列為甲乙丙級工程，乙丙待批，有急需或等得太耐就升甲級，交規劃工務panel議員傾工程細節；規劃審議認同要求合理後就交財會批錢，一經作實工程就會招標開展無回頭的。
~~~~~~~~~~~~~~~~~~~~~~~~~~~~~~~~~~~~~

近排好出既古物古蹟辦事處，只是負責判定那些建築屬古蹟。評核標準其實好闊，就其人手是否足夠而定──人手夠的話，好似試過調查各區建築大做紀錄(傳說有一年請左大批歷史系畢業生就係跟這些紀錄)，是以近日炒到火紅的所謂「50年」標準，其實是指處方人手及資源只能cover 50年以上的建築，所以某些特別有意義既建築係可以保留。

呢個咁有文人氣息既部門，平時做研究然後交報告比審委批核(雖則審委又通常都信專家通過報告)；只有當工程與既定古蹟有衝突，部門先會派人到立法會向議員解話游說等等。市民可唔可以提出建築要求評級? 資深同事話可以喎，不過等幾耐處方先有資源跟就唔清楚了。
~~~~~~~~~~~~~~~~~~~~~~~~~~~~~~~~~~~~~~~~

政府或市建局的計劃，都要做足前期諮詢環評報告等等交城規批核，私人發展商就唔駛做前期野；凡此以上臨臨種種爭持過後，最後把關的就是交報告比城規會，而個會第一招就係刊憲。如若在區議會層面都頃唔掂數，就可以在刊憲時提出；當然即便有人反對，政府仍可請求行政會議特別批核以繼續進行。但這一步就己經叫做將問題「直達天庭」左，做得太差的官員可就影響仕途了。

所以觀塘事件之中，市建好似做緊前期工作之中既環評，有團體話會在環評之中搞事以釘住單野，但實情係環評係佢設計又係佢寫報告又係佢，釘佢唔住的。又，利東街話要在城規上訴打官司，但連灣仔mega tower有財團支持都打唔羸，據理力爭的作用都真係…
~~~~~~~~~~~~~~~~~~~~~~~~~~~~~~~~~~~~~~~~~~

而油麻地問題，亦是早在02年交通委員會傾過，上個月又傾多次，連9月油尖旺區議會開會，主力都只係炮轟中九幹線建得慢，得個性秦既區議員提出剷走咁多居民設施會有問題。而當天星過後傳媒忽然要捽新聞，才會出現這星期內報紙連登幾日外加各各組織又忽然湧出黎聯署要求保存等等等。但大鑊的是，無邊個知道或查過件事來龍去脈政府想點，外加沒有一方說得清想留d乜、留黎做乜以及最重要的是──居民商戶想點樣。

沒有持份者意見，政府好易做到拉一班打一班再製造有利民意；亦即如果外來組織真想跟，當件事未被傳媒炒作之前，必需早早落去插旗收集意見聯繫居民。區議員當然有優勢，但因為樹雄所講的割禾青現象都真係時有所聞，加上好少區議員又真係識城規野，所以都有空間比外來組織插旗，但就要早囉。

至於咩人真係有早早開始跟各區城規? 講你都唔信，其實立法會議員以及幫佢跟城規既助理，真係逐個步驟都要跟足，但議員就按「實際考慮」捽新聞，助理則多數只看不出手(個人覺得這是職業病)。真係好例外地又知件事又肯出手既人，就如前文所述就油麻地件事入紙立法會申訴部班人，在全世界都剩係掛住天星之前，己做好資料入埋申訴部(詳情唔方便透露，但人地有做好地區工作先嘈出黎)。部份好唔出名但有地區網絡的ngo，諸如基督教乜乜會或乜乜區街坊會等等都會跟足的，但最後多因行動力不足，通常都會找議員幫手，結果變左幫人地出新聞。

用心瞭解呢個咁複雜既過程然後靜靜聯繫居民做好網絡，定唔理件事來龍去脈臨到有新聞炒左出黎先做大佢? 我想問的就是這個。更重要的是, 如何讓市民不再殺到埋身先出聲? 我想鬧的就是這個。

氣完，願往後城規工作不會變得比從前更難做。

延伸資料：
想知清楚油麻地到底點拆http://www.legco.gov.hk/yr01-02/chinese/panels/tp/papers/tp0426cb1-1558-3c.pdf

氣完‧作結

氣頂了幾日，氣完。純粹因為再一次覺得，不同人種之間，溝通的可能性幾乎零。

有晚去天星，捉住搞手之中識得既某人吹水(當晚佢就被人拉左，唉)，問佢：

我：其實呢，我一直睇新聞，都唔係好知你地個訴求係乜喎。
佢：唔，我地都無話定得好實，但就要求原地保留囉。
我：咁但係保留黎做乜，為乜，而你地下一步的抗爭行動會做乜?
佢：我地無傾得好實，因為其實好多唔同既人黎左參加，連大嶼山xx組織都有人黎…
我：咁如果係咁街外人唔會明你地想做乜架喎..
佢：係啫但係我地覺得要做左先囉，因為政府咁樣唔理民意，其實係唔公義既行為，所以我地要voice out 左先…(下刪百幾字大概意思就係今次行動係為左反對政府漠視民意之類)。
我：…
佢：係呢，點解個個記者都追問我地保留黎做乜，為乜，地下一步行動係乜?
我：係人都會問呢幾個問題的。

我明白你地係後現代政治聚合以行動為依歸沒有統一的帶領者或行動理念只要目標相同便可以走在一起反抗主導權力的壓迫。然而，我不想信各位可以天真無邪地相信正義必勝只要所做的是為公義便會成功便會改變世界。

對於堅持公義的一群，我明白你地立場正確堅持有理。然而怪主流媒體無料唔明或唔理你地所持既公義只將你地塑造成憤青是完全沒有意義，他們本就是建構權力的一部份如果他們有用也就沒有獨立媒體的出現 , 然而如果連最愛撐市民反政府枱的蘋果都不大做，其實件事有幾多市民撐有幾多人關心，心照。怪政府不聽民意諮詢靜靜過左令各團體漏招更加荒謬，我再重申一次政府就是希望靜靜過左無人知佢想做乜，識唔識小學學過一個成語叫「與虎謀皮」?

係呀搞到咁大當然即時有市民到場聲援(但其實得幾多人，心照)，blog又好電台又好都多左人嘈，咁又點? 就像每次鄰近地區有天災人禍香港人梗最快捐出最大筆錢，但就迅即可以將件事拋諸腦後對政治社會人地國家發生咩事置之不理繼續以錢為核心價值。

這種消費模式，對於越大件既事越有用，於是叫人對話叫人討論就更加難。上一篇貼文己指出變成淨係倚賴傳媒炒作會死，因為只會令市民易於消費問題跟城規的組織會更漠視前期工作到死先黎炒作──結果係尋日睇新聞己經見到甘乃威走出黎話保留域多利，並唔排除會作出更激烈行動，死未。

天星事件好快就會被人升上神枱，如同七一一樣。堅持公義在建制以外努力的人，我明你地既立場；但那些只將件事看作咩咩「以肉身感悟對抗政權的侵害」之流，我火滾。唔理件事既討論唔理會發展成點將件事睇得咁個人既話唔該你死埋一便咪阻住曬你幾時有快感幾時高潮幾時coming幾時射關人差事打飛機唔該返入自己房咪連好心都無係度搞禍件事!!!!!

氣完，願往後城規工作不會變得比從前更難做。

我繼續頂

樹雄：

天星問題一早在，星島篇文沒有抺黑，做城規的各組織今次是自己漏招，與人無尤。政府所有諮詢都係”公開地靜靜做左”，佢就係想無人知，但佢有依正規章登報紙出諮詢文件，市民睇漏左可以接受，但做城規的組織漏招應該認。

至於各區重建，街坊當然有企出黎，我鬧的是那些青年組織議政人士。你說的對，街坊最切身一定是第一班企出黎，然而唔熟程序唔熟法例，好易比個官點黎點去。於是，要有人肯keep住同街坊溝通，要將問題的嚴重性解俾街坊知，要幫他們做組織以免比政府”拉一班打一班”。

所以，以觀塘為例，單野死都埋身至少要多一年半載，而現階段正正極需要一群可以幫手聯繫街坊的人，幫手組織類似h15關注組的組織，提早在你所講”政府所有程序開始之前，制止佢、逼迫佢談判”。

但我今次火滾既就係，觀塘單野我聯絡過佢地，起初都話有興趣，但搞下搞下無下聞。啟德咁大鑊，牽涉咁多個舊區，佢地直情影都唔見。更加唔好提尖咀天星都要搬、中九龍幹線拆玉器街等等等等其實己經有政府文件出左，但就無乜人理既議題。

我比你今次公民抗命成功咁又點，變左比抗爭團體同市民及政府都知道，只要最後一刻有人走出黎割手，就可以要到想要既野??於是抗爭團體更趨向於唔做前期工作到死先出黎炒，市民更加唔駛知道個社會發生咩事剩信報紙炒作，政府的應對方式，就更加唔駛講。

你跟居權咁多年都知，變成只靠媒體炒作的後果是怎樣。

至於”中九龍幹線要起，拆左油麻地停車場，清走算命檔、剪開左廟街”，交通事務委員會傾過，文件會議紀錄都在網上，市民想即時聽會都有網上廣播；份申訴文件亦今日到左我手，12月15日開會。

Aster
繼續做到好氣頂

我頂

聽立會直播，人人口口聲聲集體回憶文化保育，對於有人搞公民抗命則口徑一致地讚人文質素的提升、市民良知的覺醒等等等等。

頭痕，加肉麻。

全都過廟了才來嘈才來搞，明知工程己經開動才來捽政府，點做? 徐嘉慎俾人恐嚇時d人去曬邊，早輪告別天星之夜d人又去曬邊，尋日班後生俾人又拉又鎖時d人又去鬼曬邊。

每單城規重建個案其實都經兩年以上爭辯才落實，做前期工作時梗無人出手幫，次次到個個案死左各團體先出黎嘈，頂。

近排啟德觀塘做到我同事死，但就勢孤力弱其他團體無人出聲。當然，同事好睇得開咁話，等過多一年半載單野臨死前，自然有好多人湧出黎話還我土地。

我頂。

咩產

薄落高手講咩產，好應棍：

「搵到錢，個仔入到名牌小學，之後升到名牌大學，考到專業牌，之後又搵到錢，咁米得囉。到時政府攪唔攪GST，屏風效應有幾勁，醫療融資傾唔傾，都唔關我事。得閒，至多我嘈兩聲質問下政府，為咩我交稅咁多，但係咩福利都冇，咁米得囉。」

應棍當然不是我係咩產又或我家係咩產，而是朋友之中，想做咩產既唔知點解越黎越多。

中小學時期識落既朋友就唔在講，屋邨仔女想階級升遷都好正常；令我頭痕的反而是大學識落那批，本來都是邊緣國事人社運人文批青年那些。(來訪芳鄰觀迎對號入座)

唔係想好老土咁抽枰各位當年九up過既野點解咁快煙消雲散，反而想講既係，安全感迅速消散面對問題越黎越犬儒，然後各人都趕緊尋找可以享受的各種物質，咪即係想做咩產囉。

而我地2字頭呢代將來成為既咩產，前面生仔讀書一項少會有人做；多出黎既錢同時間做咩呢，自然用黎將間屋裝到好有品，飲食衣著各項當然好有格，最緊要閒時識得好有品味咁去下新畿內亞旅行下，咁囉。

比我更左既同事拍枱鬧：好心d人分清楚餓死同食得無咁好既分別啦!
我既翻譯係：好心各位分清楚揾食同生活空間既分別。

夢想成真左一半

討厭影畢業相，除非有人借到個bb俾我抱住影；其實最想抱住自己生的影一張，讓仔仔見證媽媽終於肯畢業。是以一直未有借過袍影之餘，亦鮮有出現在別人的畢業相內。

然而早幾日，中大同學仔畢業，替她和她的男人楂機，旁邊不認識的同學仔一家大細連埋隻狗影緊畢業相。

望左半小時，終於鼓起勇氣問個主人：可唔可以借個bb影張畢業相?

bb主人好大方地答應，趁bb未喊出聲，嗱嗱臨交佢俾同學仔影左張。

雖然不是我親生又不是親手抱住影，但都算將個夢想成真左一半。

下年到我畢業，要生就生唔切，看有沒有朋友己經生左借黎影多張。