dklm

考試, 做完份卷先知要用學校電郵交, 十年都無開過當然經己死左.

追問個考官, 得到既答覆係 : 我地用電郵通知左考生要清理個郵箱啦.

dklm

諸事不順, 匿埋養病, 係咁.

我在反省

衙前圍有先賠償後規劃同灣仔可能有地積轉移係因為林鄭想要黎換皇后可以和平解決順道將幾幫社運人以及唔同階層居民分化激化矛盾...

官府係耍緊手段, 但激烈的行動到底是交涉手段還是終極目的? 想要的不止是一個皇后, 明白, 但長遠的跟進到底是定下可行目標逐一交換逐步爭取, 定只是叫出很高價的價以致反而下不了台? 一拍兩散讓林鄭下不了台從而連交涉空間都沒有, 賺的, 只有官府.

當然, 同事樂觀指出, 無論如何星期一都要降温, 所以, 該有的, 打個八折都不會太差. 總比什麼都沒有好, 建制內的我們如是想.

而又, 我在反省自己說話的態度. 因為發現, 溝通技巧原來比論點更重要, 態不好觀點其實都沒有交流. 如果一開始不是建立這種針鋒相對的對話, 至少不會讓在這兒公佈的每個訊息, 只是變成挑起對罵.

無論如何, 星期日會有結果, 可惜我不在港.

皇帝駕崩

「九龍皇帝」曾灶財去世

(明報) 07月 25日 星期三 07:15PM

自稱「九龍皇帝」的傳奇人物曾灶財日前因心臟病 發去世，終年86歲，他生前經常在街上塗鴉，遭檢控無數次。

曾灶財近年靠申領綜援 過日，在安老院渡過晚年。在九零年代，有香港設計師起用他的塗鴉作為時裝設計靈感，在三年前，有賣行拍賣他的塗鴉作品，以五萬五千元成交。

曾灶財真名曾財，十六歲來港，曾從事雜工及垃圾站工人。他聲稱根據族譜，皇帝曾御賜九龍給他的先祖為食邑；從此，他就自號「九龍皇帝」，經常塗鴉，指摘英國非法佔領，宣示主權。

~~~~~~~~~~~~~~~~~~~~~~~~~~~~

由於政府行政效率低(至少低過佢當年寫字既速度)，咁啱中學又在他的領地核心，是以其墨寶還真由細睇到大。修美術時，有份功課要做pattern的練習，圍住秀茂坪行一圍把他的字拍下，臨摹過幾遍，可惜相找不回了。

從未聽過有人說他瘋，連官員都知他只是有點傻，而且非常精靈到識分私家牆唔畫得，是以盡管其墨寶於某些人而言十分滋擾，但都無話要拉要鎖。

而又，年前有人冒其字跡畫花左幅私家牆，惹來警察插手上埋新聞，但立即有班文藝人跳出黎指證唔關佢事幅字係膺品；又，佢當年拍左個廣告賺左少少，社署有官跳出黎話要截佢綜援，立時都有班人出黎救駕。

香港人，都幾愛呢位老人家。而更愛的，或許是當年各方人馬包括官府對古怪事物的包容度，包容呢類踏左少少界又其實無傷到人的行為。換轉今日邊個用呢種方法宣示自己既想法，唔駛一星期被人拉硬。

懷念到處都有他墨寶的香港。

離奇

殘疾人士交通需要小組，離奇曲折。

復康巴士唔夠，的士業界見有商機，申請搞傷建的士(成架輪椅直接上車那種)，但次次都比班官話呢樣唔得嗰樣唔得申請失敗。屢敗屢戰搞左一輪，福利局無端端自己推廿架傷建的出黎，收費仲要貴過搭的士。

於是成個小組會，一面倒小到七彩。

傷建團體小班官完全無考慮使用對象所佔比例，廿架都係豪華車每次電召貴過的士；的士業界小班官與民爭利申請多年都唔批但又忽然自己買廿架，仲要買左款貴又唔值既車番黎焗住要提高收價；超超之類尊貴小班官低能做之前唔問下人又唔睇下價錢亂用錢。

開會小官己屬慣例，但呢次，真係好難明白。馬會比舊錢你規定剩買一種車? 一半用黎買巴士得唔得? 的士佬都搞緊你唔比佢搞? 邊個部門負責打價? 邊個部門做市場調查? 咁低能既決定邊個落?

唔知係咪大家對常理個定義唔同，當今次團體業界同尊貴都唔算係雞蛋挑骨，只係用常理問番各位大官呢個決定既理由，但都係無答案。

真係好想問下，部門裏頭一層層既文件過後，真係會出左咁離奇既決定??

先安置、後規劃

你話係林鄭想威又得，話係要為月底拆皇后向公眾落定藥都得，但呢手，確實漂亮。

比起天星皇后街市，衙前圍至少在理據上，嗌保育既聲音響得多；而官府所面對既困難，又的確比其他項目單一(夠膽收齊先同發展商鍊即係個官攬上身)。而漂亮在於，呢種咁既問題，又唔係大項目，但咁鬼麻煩又拖左咁多年，正常既官都係”拖死佢”，等班居民同跟進團體自然死絶先做野。

但林鄭夠薑出呢招，而且預左跟開其他重建項目既尊貴或ngo，一定嘈到佢飛起又或者夾計告政府，但，佢一句”居民生活環境惡劣”(唔理真心定落藥)，賺晒。18號民政個文物會，即場就有尊貴”焗住”要追佢喺波鞋街同觀塘照做，同樣比佢用好漂亮既理由耍走。官場老鬼，對應高章無位入。

其實諮詢出黎未必做得成，但林鄭一開口，跟開重建既組織無辦法唔即時吹雞，要區內既人腳同居民開大會跟，但，跟又焗左入個死局──跟開會知衙前圍的例子確係好特殊，而且政府真係無法用同一手法食埋其他重建項目區。

然而居民一定話好而且群情洶湧之下，照迫林鄭搞禍件事就會變成”為左自己區既利益拖跨左衙前圍既居民”，唔迫林鄭又會好難向區內居民交差(唔好以為你幫開佢地就會得到佢地諒解你政治上既取捨)。林鄭最後做定唔做，都己經唔重要。

個人黎講，希望佢做得成，事關衙前圍的確拖得太耐(拖到前村長九叔過身，同事老闆提起都唏噓)。而且有(即便立埋約只此一次)總比無好，唔係次次都得”拉一班打一班拖三五七年快刀斬亂麻”，打開左個缺口至少自此以後，向官要求用其他方法，又或個官向上頭要野，其實都比較好開口。

而又，近日報章話天星搬左之後政府以商舖租金為手段(唔係因為人流呀)，令到天星收入下跌間接陰乾；而又好快輪到尖咀天星搬埋過尖東後，明顯政府將進一步焗天星變成旅遊項目。呢d，都係跟開城規又或跟開天星需要跟進既野，露營係咪真係有用呢?

月底真係唔好有流血事件，拜託。因為完全無意義。

讓我看得很難過的電影

公司包場睇《老港正傳》，觀塘銀都，坐無虛席。

大量影評罵過其中的選擇性失憶，在此不敍。事實上套劇只是一部近代版《危樓春曉》，變成天台戶小家庭血淚史加父子恩怨，說是回顧時代記念回歸倒是過譽。

而讓我看得很難過，除卻對白寫得十分硬(毛姐句「我綿乾絮濕守住呢個家…」聽到頭都痕)，還有導演非常寫實地將一個堅持理想既人，寫成一個on居既笨實。

因為，這群人其實很大程度不是相信那個政權，而是相信那政權早期所塑造的世界觀。於是，就像當年「人人為我、我為人人」既吳楚帆，主角雖在言前言後都係毛語錄，但實際行動都是很簡單的幫助別人。我成日帶住個「為人民服務」既毛袋出入工記，就曾被某老人好唏噓咁話「雖然好似好老土，但為人民服務係好思想」。

是以那些選擇性失掉了的歷史片段，唔拍出黎其實最對唔住像主角那群人；就是因為經歷了那些仍然願意相信先前所相信的，他們才是真真正正的左仔。而那群在那些事件後「醒覺」，拿拿聲就下海做生意揾錢，又或只是借個朵黎揾食既，是另一群人。

所以當套戲去到主角給妻子埋怨只顧替人煲湯無顧過頭家、寧願繼續住天台都唔肯住公屋又或者存個錢買私家樓、到後來妻離子散得番一個人在天台時，後排不時傳黎陣陣低泣聲。當然大量大量人笑佢地on 9(尤其借朵上位的那群)，又或者佢地都覺得自己on 9，但幫人，不是錯事，儘管白鴿老是說那些只是小恩小惠。

又，戲中主角一做幾十年的左資戲院，其實就係觀塘銀都，它被neway食掉大半後原來還在掙扎生存。當然，觀塘重建開動後將會塵歸塵土歸土，但跟開重建的各組織(連帶成日舉集體回憶牌既團體)，都無人提過下點「保育」佢，尤是證明集體回憶是多元的。

而又，對於點解要揾個英國混血兒演老左，觀眾都無乜疑問。但那身白恤衫西褲大膠框眼鏡，以及秋生温温吞吞既演繹，還真是許多工記人的典型。

生日快樂

在路面温度近35的下午，2名搞手聯同5個就/過生日既七月之星，一齊大埔至大尾篤踏單車慶生。沿途乾煎中暑熱到頭赤脂肪溶解，本來覺得是次壯舉好笨實；但過後，在大尾督水霸之督對住個藍天碧海，天大地大全身鬆曬，實在非常過癮。

既然全球暖化熱島效應避不過，唯有積極面對挑戰耐熱之最。而某生日之星都話咁樣幾好，唔好次次都食飯通k玩到人都老。有人贊成當然繼續，是以下次壯舉暫定行山遠足，且看搞唔搞得成。

~~~~~~~~~~~~~~~~~~~~~~~~~~~~~~

晚上是籌備多時的生日會。搞得唔好場太細朋友只能排排坐無得癲有夠掃興；冷氣不足悶焗左個幾鐘我都唔察覺，令到朋友們過了一個非常悶熱的生日；外加約到最後一日先發現其中一位朋友原來都係七月生日，而我竟然唔記得(原初以為只有四位七月之星)。粗心大意罪過罪過，凡此種種實在非常抱歉。

能夠看見一大群喜愛的朋友聚埋開心，搞手自己先就非常高興；雖然籌備過程中有大量意外同麻煩，搞完之後通通都變成搞得好過癮的元素。但自己遇到問題容易向人呻的習慣，原來惹起朋友誤會我搞得唔開心，實情係無咁既事我搞得好過癮，壞習慣要戒要戒。

聚首的作用是至少知道大家的近況，有人就結婚好幸福有人轉到份自己鍾意既工有人剛散拖了但好風騷其他人依舊老樣子無穿無爛。但願往後聚首的場合都是大家可以高高興興的日子，雖則理所當然是妄想，但都盡力而為就是。

總之，我愛你們，生日快樂。

爆虛偽

三成半受訪青少年常瀏覽色情資訊
(星島) 07月 14日 星期六 01:14PM

一項有關青少年面對網上色情資訊的調查顯示，個別青少年誤將網上看到的不良行為合理化，負責調查團體促請，學校與家長正視問題，向青少年灌輸正確性知識。循道衛理楊震社會服務處中心就網上色情資訊訪問逾700名青少年。結果顯示，超過七成受訪者曾經上網獲取性資訊，包括色情相片、片段。三成半有頻密上網瀏覽色情資訊的習慣。兩成不介意朋友或伴侶的裸照上網。三成擔心觀看太多色情資訊後會模仿而犯罪。

不過，個別青少年誤將網上看到的不良行為合理化。循道衛理楊震社會服務處中心主任趙德財舉例說，一些青少年在網上見到朋友與伴侶拍攝到的裸照，放於網誌上，認為是沒有問題。趙德財認為，網絡色情資訊對青少年的道德觀及分辨能力產生負面影響，建議學校推行整全的性教育，而父母則要主動與青少年談性，以建立正面的性知識。而青少年面對色情資訊氾濫也要提高自我保護意識。

期待

反正都要大瀉一場, 不如比左秋官, 成就呢個咁有香港特色既傳奇.

續中年極品

壓倒性多的評論都說, 嫖唔嫖係私人問題, 佢家人先有權過問同公職無關.

奇想, 如果事主係己婚女高官諸如牛油芬針加麗之類, 評論會唔會都咁"公道"??

中年極品

叫雞搞到要辭職，祖國同胞唔知會唔會覺得好出奇。

事關，你官有番咁上下大喎，走去全港最旺既鬧市買私鐘仲要繞手行住去爆房?? 下?? 落銅鑼灣叫北姑?? 唔識包間酒店房叫「room service」??千五唔講價比夠五千??無車行過去租房?? 唔知九龍塘d房連車位? 五十幾歲人斷正唔曉講大話?? 擒高擒低以為避得到定練緊腰力?? 個公關走出黎仲硬撐係朋友條女??

當然宜家傳到人地「請佢」，條罪大好多，但又未必空穴來風喎，如果唔係點解釋以上十九幾個問號。

而又，呢d咁笨實既中年極品，竟然係高官，真係攞命。

初陣

下面篇文吹既風, 其實吹左好耐. 不過同事話寫手既傳釋"太直接", 尤其, 白鴿那邊的配票能力以及各團隊內的內鬥問題, 點會唔影響大局...

~~~~~~~~~~~~~~~~~~~~~~~~~~~~~
隔牆有耳：立會執位記之癲狗鬥狂鳳
蘋果日報 李八方2007-07-06

出年立法會選舉直選有30個議席不變，不過其中兩個選區議席數目有變化，選管會噚日公佈下屆立會選舉選區分界臨時建議，九龍東人口少，由五席減至四席，九龍西猛起屏風樓，多人住，添多一席有五個位，其他三區香港島、新界東、新界西議席數目照舊，分別維持六、七、八席。

九東九西一減一加

九龍兩區一減一加，首當其衝相信係民主派九東少一席，左派嫻姐同陳鑑林好穩陣，就算搵其他人選都硬兩席；民主派三個只能活兩個，梁家傑、鄭大班同李華明是但一人要犧牲，社民連陶君行懶理，「買定飛睇歐洲國家盃好過。」八方建議阿陶留香港，因為九西選戰精釆程度可能媲美歐洲國家盃，正所謂多個香爐多隻鬼，有多個位仲唔鬼打鬼？八方聽聞自由黨威迫利誘葉劉空降九西，等副主席劉健儀港島唔使選得咁辛苦，葉劉點擺位有變數，好多人相信佢最想港島選，八方噚日問過葉劉，佢就話未決定。毓民都好有興趣去馬，若然成事，兩強九西相遇，上演一幕「立會執位記之癲狗鬥狂鳳」，肯定好戲連場。毓民則同八方講，搞好年底區選先講，若社民連輸到一仆一碌，佢會辭職負責，休提從政。

毓民：去馬冇難度

毓民又話，去馬九西冇難度，畀佢揀就落九東，橫掃民主派，力壓左仔先過癮。小道消息話黃英琦都有意思，因為想睇實西九文娛藝術區，佢同八方講呢個提議「有創意」，但家專注辦學，參選立法會遲先諗。佢唔諗住，公民黨毛孟靜就好積極密密九西做功夫。九西歷來陽盛陰衰，有個女將參選勝在有新鮮感。另一「奇兵」係鄭大班，熟識佢人話，除非大班另有好路數，否則有機再選，九東少一席，轉去九西唔奇，貪易選；當然，地頭蟲民協都有機多席，民建聯想多一席進賬，家唔可以話冇可能。港島區選情上屆最戲劇性，人人為保馬丁令何秀蘭出局，何秀蘭出年捲土重來，有人建議分四條隊選，諗辦法分勻選票就擸四席，保送多一個民主派入局，不過配票難度極高，搞得掂真係民主英雄。新界東、西形勢一眼睇晒，新東「開門七件事」，最好得現任七人報名，自動當選；新西就睇公民黨陳家洛，佢加入戰團，民主派就頭痛，隨時益左派多一席。

偽261

漫畫界近年最離奇的無頭公案, 應該是富慳的HunterXHunter無端端在260回無聲無息地脫稿.

據說日本漫畫界的慣例, 由於版權屬作者與出版社共有, 是以就算作者唔畫, 出版社都會比筆錢買斷個權然後找助手代筆. 云說漫畫連載也有預先賣埠, 一旦斷稿要賠的數可大可小.

然而Hunter之死, 卻是連出版社都沒有交代之下脫稿而亡. 網絡傳過好多過版本, 比較可信的傳閒是富慳唔滿意比人改橋, 於是成日"外出取材"令每周連載變隔周連載; 於是出版社亦一拍兩散, 寧願賠錢搞大件事(因為咁樣富慳都要賠好大筆).

真真假假都係得個傳字, 然而近日朋友在網絡上竟發現偽261回。
個人覺得不論是畫功分鏡情節舖排都有九成真, 各位點睇?

儀式

唔記得邊度睇番黎，面對突發事情又或生活大轉變，那種亂七八糟茫然若失的情緒，總是要等某個儀式的進行，才能逐步穩定然後了結。

切身感覺是茫然若失之間，實在無法什麼也不做只等結果的到來(且其實未必有結果)。於是，畢業禮如是葬禮如是，越是複雜越是讓人煩惱的儀式程序，反而能讓人漸漸將情緒歸一。

雖然程度輕微好多，但籌備過程還是可以有所寄託。至少比個藉口自己，在那天到來之前可以放縱沉溺，以及期待那天過後，可以將生活重回軌道。

七一

1.
沒有原因，今年選擇了旁觀，人在中環但沒有走進人群。

2.
6點半在金鐘己見龍尾，3-4萬總有的，龍尾竟有一隊完整的銀樂隊，有無人知屬於咩機構?

3.
8點幾陪兩老在家看煙花，王才子一句「如果我地好似向日葵咁，咁祖國就係我地既太陽囉」，當住兩老面我爆粗超過一百字。

4.
歷時超過半粒鐘既煙花匯演，主持人「祖國袓國」的不下數十次，聽到彬少都問，咁香港喺邊?

5.
10點幾，某人長途打黎，佢話「靠班覺得自己係全憑個人努力向上升既人做領導班子，香港唔保守就奇」。

6.
又，承上，某人提醒「分分鐘幾廿萬上落既人唔會覺得需要保障基層，事關佢地覺得基層係『自己無本事做份好工要捱到死係你地抵死喎，點解要幫你地』」，唔。

7.
11點幾，老父又哦「宜家香港d後生做人真係無責任感，又唔計劃下將來又唔諗下幾時買車買樓結婚生仔，旨意佢地就真係死得」。結果當然係大家不歡而散。

8.
1點幾，msn，另某人話「我剩係會在我可以控制的範圍內做選擇」，ok所以環保社會民生基層問題當然都可以充耳不閒。我明呢個係大多數人的生活方式，好「正常」。